Simulim i menaxhimit të një kompanie në kuadër të Biznesi Summer School 2026

Në kuadër të aktiviteteve të Biznesi Summer School 2026, studentët e programeve studimore Menaxhment dhe Financa (MA) dhe Menaxhment dhe Ekonomiks (BA) morën pjesë në një simulim praktik me temën "Simulim i Menaxhimit të një Kompanie – Vendimmarrje Strategjike për Investime".

Ky aktivitet u organizua me qëllim që studentët të aplikojnë në praktikë njohuritë e fituara gjatë studimeve, duke u vendosur në rolin e menaxherëve dhe vendimmarrësve të një kompanie. Të ndarë në grupe pune, pjesëmarrësit analizuan skenarë të ndryshëm biznesi, vlerësuan mundësitë e investimit dhe diskutuan strategjitë më të përshtatshme për zhvillimin dhe konkurrueshmërinë e kompanisë.

Simulimi u organizua nga Prof. Assoc. Dr. Betim Spahiu dhe u zhvillua nën udhëheqjen e tij së bashku me Prof. Ass. Dr. Nexhmije Kabashi dhe Prof. Ass. Dr. Burim Morina. Gjatë aktivitetit, profesorët mentoruan grupet e studentëve, orientuan procesin e analizës dhe vendimmarrjes strategjike, si dhe moderuan diskutimet dhe prezantimet e zgjidhjeve të propozuara.

Përmes diskutimeve, analizës së rasteve dhe procesit të vendimmarrjes, studentët zhvilluan aftësitë e tyre në planifikimin strategjik, analizën financiare, menaxhimin e investimeve, bashkëpunimin në grup dhe prezantimin profesional të ideve. Në fund të aktivitetit, secili grup prezantoi zgjidhjet dhe rekomandimet e tij, duke argumentuar vendimet e marra mbi bazën e analizave të realizuara.

Aktivitete të tilla janë pjesë e qasjes praktike të Biznesi Summer School 2026, e cila synon të lidhë teorinë me praktikën dhe t'i përgatisë studentët për sfidat reale të menaxhimit, analizës dhe vendimmarrjes në organizata dhe biznese.